Alexander Martin RemollinoAt isang krimen na pala
ang magkampo sa harap ng isang "arko ng kapayapaan"
upang hingin ang talagang sa iyo.
Sana, bago padapuin sa kanila ang inyong mga pamalo
ay naisip muna ninyo
na ang mga katawang "humarang" sa Mendiola
ay hindi lang mga tagapaghatid ng pagkain
sa inyong mga hapag:
kabilang din sila sa mga bumibili
ng pampaaralang mga gamit ng inyong mga anak,
ng mga pulseras at kuwintas ng inyong mga asawa't kabit;
ng inyong mga uniporme, medyas, at kalsunsilyo.
Sana, naisip ninyo ang lahat nito
bago ituring na mga kriminal
at padapuan sa inyong mga pamalo
ang mga katawang "humarang" sa Mendiola
upang hingin ang talagang sa kanila.
